念念不忘的焙茶芝士蛋糕😍☕️🍰 [Chopsticks Fork n Knife@黃竹坑]

隨住時代變遷 交通愈黎愈發達..
連黃竹坑呢個對我黎講曾經係最遙遠既距離 亦因為南港島線通車而變得觸手可及
對我地一班新界友黎講 簡直就係大好機會去探索新大陸😂😂

今晚黎到One Island South (之前去One Island East就去得多...south係第1次黎!!^0^)搵食~~~
可能係weekend既關係 呢一帶都係超級寧靜呢!!!
(定係南港島一向都係咁寧靜🤔)



非常有格調既一間餐廳.. 空間闊落 走木系小清新路線
大大片仿草牆壁同多張雲石枱.. 令人好有影靚相既意慾!XD



呢度既有日式食物 好似日式便當🍱 ,饅魚飯,咖喱烏冬咁..
但又有唔少西式選擇.. 例如有意粉,all day breakfast同burger🍔
正正呼應返店名: Chopsticks🥢 Fork n Knife🍴
西日合壁.... 同多幾個唔同口味既朋友一齊黎食都得^___^

望見最底個行---窩夫 我地幾個女仔即時心心眼😻😻
但落單時先知..原來窩夫只在下午茶時段供應>< 好可惜..... 
超失望呢.... 好希望店家可以考慮下將窩夫供應時間延長!!



飲品方面有好多選擇!! 而且大部分既配搭同賣相都好吸引
當中最吸引我既大家估唔估到係邊樣呢~~~
下面會開估.... >v<!



凱撒沙律$88🥗
沙律頂部白色個一團 初時大家都以為係cream cheese..
唔覺意篤一篤先發現原來係流心蛋XDD 🍳🍳
個人黎講都幾鐘意流心蛋加沙律菜呢個配搭~~~😍
不過佢既凱撒醬略嫌淡左d.. 如果濃返d會更加好味!!

炸蕃薯條$43
呢個邪惡得黎好正呀😍😍 蕃薯條焗得香脆 又有濃郁既香甜蕃薯味~~~
比起就咁食炸薯條都好似健康d (一定係!!)


份量非常大既一碟 卡邦尼扁意粉配溫泉蛋$98 !!
溫泉蛋既流心效果真係100分呀🤤 蛋黃岩岩好係凝固狀態
而蛋白就呈半生狀態 口感好嫩滑~~~
而且扁意粉既軟硬度都適中呢~~🍝
唯一美中不足既係醬汁既忌廉味過重.. 所以食完成碟都幾漏架..
最好要同多幾個朋友一齊share!!👯👯

南瓜可樂餅咖喱烏冬$98
個咖喱烏冬一定一定要襯熱食!!! 香味非常濃厚!
每條烏冬都掛滿日式咖喱的香甜味... 可口之選! <3

自從上年係日本食過可樂餅之後就念念不忘 呢度竟然有得食!!!!
真心好好味, 南瓜蓉又甜又軟身..好似可以唔使用力咀嚼已經食得到咁~~
而外層既麵包糠薄薄的..炸得好酥脆
呢一件南瓜可樂餅的確可以一解對日本可樂餅相思之苦😻~~

雖然無窩夫.... 但好彩佢地仲有蛋糕出售~~ 每件定價$48
左: 柚子芝士蛋糕 - 真心覺得唔錯呢, 做到清香既感覺..食完完全唔會有膩既感覺
中: 法式歌劇院蛋糕 - 呢個就較為普通..朱古力味唔夠濃同埋成件cake偏乾身..
右: 日式焙茶芝士蛋糕 － 💯必試推介!!!
雖然覺得佢味道似奶茶多d..但個陣茶香味真係好濃郁❤️
同埋真係好鐘意佢口感非常濕潤幼滑!!❤️

好啦開估.... 我揀既飲品係鮮奶香芋(熱)$38 (凍$40)
其實真係好鐘意香芋既甜味架..耐何唔係度度都有出香芋產品../^\
呢一杯將香芋既甜味同latte既綿密順滑配合得好好呀T^T
好滾動有香芋味選擇仲要做得好飲! T____T

朋友叫既 熱蘋果薑茶$28
佢地話薑味都唔算太重 易入口~

仲有另一位朋友叫既 荔枝愛玉梳打$36
賣相非常靚靚呀😻

總結 呢度既環境同服務其實都好唔錯呀..
而定價方便其實都合理.. 因為佢份量都唔少
如果店家可以提供更多甜品款式比客人/將供應時間變得更flexible會令客人有多d選擇
另外意粉方面如果可以多加留意醬汁既調配 相信整個用餐體驗會更加好!! : )

店家: Chopsticks Fork n Knife
地址: 黃竹坑香葉道2號One Island South 1樓110舖
Shop 110, 1/F, One Island South, 2 Heung Yip Road, Wong Chuk Hang
電話: 21103699
營業時間: 星期一至五8:00-20:00,星期六10:00-20:00
Openrice主頁Here