唔太餓咁黎食Outback 其實都唔係太貴的^__^ [Outback@屯門]

今日突然間心癮起.. 想食返已經好多年都無食既Outback Steakhouse!!🥩🥩
當時對佢印象最深就係: 1)有得無限添加黑糖包 2)食扒好貴
唔知今次再黎 會唔會有改觀呢>v<'''


位於屯門市廣場入面既Outback有分店內同店外座位
我地大約7:30前已經黎到.. 未算係晚飯既最高峰期
無諗過一行入去員工就話室內既話要等 問我地介唔介意坐出面
我地當時揀左情願等室內位~


點知過左1分鐘員工又走埋黎話其實室內都仲有少少位...叫我地直接入座...
其實即係擺明入面係有位的, 只係餐廳想盡量推左客人坐室外位先...\__/"
雖然都明白呢種係公司政策黎... 但的確會令客人有少少唔好的感覺呢>.<!!!
希望餐廳之後可以改善一下政策... 因為打開門做生意.. 如果連咁少事都有所隱瞞.. 好難令客人有信心呢!


餐廳室內的環境::: 亦都有個細細的bar枱位置~!


未叫野食 先上黑糖麵包🍞🍞包夠暖... 亦都叫軟熟
不過其實我同朋友都唔太識欣賞呢隻包... 都係覺得要搽返層厚厚的cream cheese先夠好味~


今晚黎既目的就係食扒!! 見佢有唔少都係扒配海鮮 價錢又唔太貴.. 所以我地都揀左個::: 肉眼扒拼蟹腳$336
係10oz既澳洲肉眼扒(7成熟)+1/2磅蟹腳


先講主角--黎自澳洲的肉眼扒🤤🤤
食落去真係每啖都有濃郁的牛味, 而且好juicy呢~ 不過同時都好多筋下...🙅🏼
佢配左2個汁: 牛油同類似黑椒汁... 沾左牛油會再滑好多呢!

而呢個扒仲包左side dish 6揀2:: 焗薯仔/薯條/特色雞味飯/甘藍沙律/新鮮時蔬/焗甜薯
全部都可以散叫+$30/each
我地揀左焗薯同雞味飯^^

焗薯夠淋身~~ Sour cream好夾bacon同蔥粒呢!!
而雞味飯就偏硬身...味道一般...唔係太鐘意🙈🙈



同碟的另一主角當然就係蟹腳!!🦀🦀🦀
肉質肥美...蟹身最有鮮味!
蟹腳感覺就唔夠鮮味,有d普通... 而蟹鋏位夠新鮮,,,, 肉質彈牙!

Hahahaha影低左我地作戰後的情景 >v< 辛苦晒幫我拆埋殼的朋友了(我又掛住影相🙊)


香脆薯條混芝士$52
我覺得呢個薯條幾抵叫喎~~~ $52份量都好多下
薯條有大量芝士覆蓋, 芝味非常! *v*
不過要食快d... 因為放得耐會痴埋一塊~
沾唔沾微辣沙律醬都好好味 係2種唔同滋味黎💛

我地2個人 最後竟然食唔晒要打包@0@

同時係我地坐低個下亦都發現左做左會員先黎著數d.../^\
可以免費申請做會員... 但係要起碼1日後先會生效...
所以預備黎食飯既各位記得係屋企download定先喇***

埋單 其實都係每人$200左右~ 因為我地叫得唔多野食
而且... 如果肚餓既話其實可以加多幾次黑糖麵包 xddd
所以今次黎食都覺得性價比還可以~~~ 有機會有下次 : )


店家: Outback Steakhouse
地址: 屯門屯隆街3號屯門市廣場一期2樓2016號舖
Shop 2016, 1/F, Phase 1, Tuen Mun Town Plaza, 3 Tuen Lung Street, Tuen Mun
電話: 2426 3918
營業時間: 星期一至日12:00-22:30
Openrice主頁Here