元朗區的後花園🌷🌸食物醬汁是靈魂😋 [Aldou Cafe@元朗]

之前經過呢度幾次.. 已經覺得好靚, 好有綠洲/花園FEEL🌿今晚終於有機會黎試 : )
佢係唔近西鐵站架, 係朗屏落車之後大約都要行15分鐘左右
坐輕鐵既話就近少少, 但落車都要行一陣先到~


正正因為咁 呢度無咁人煙稠密, 仲有一種好休閒既感覺😌
一整間CAFE都比植物包圍住🌿🌿

見到個2人Dinner Set $388 幾岩食又幾抵叫, 所以好快已經揀左


店入面既感覺幾舒適,, 覺得有少少屋企既感覺(唔知點解)
即係我覺得如果我搬左去外國住既話, 我屋企應該會係差唔多咁既樣XDD

先黎2碗餐湯 黑松露野菌湯,, 聞到好濃既松露香🖤
飲落就似係食緊蘑菇蓉既感覺 .. 口感好綿密同濃郁

羅勒白酒忌廉煮藍青口 呢個真係令我難忘既一款!!!!⭐⭐⭐
事關平時麻麻食青口.. 而呢一碟我係(第一次)食唔停口
全因個醬汁好到位!

非一般既忌廉汁, 加入左白酒🥂令人食落無咁滯又增加左層次感
醬汁既口感係好smooth, 仲要有大大大量既洋蔥粒同我最愛既Basil🌱
所以食入口亦有非常清新既香味!
個醬汁亦都將青口既幼滑口感帶左出黎, 堅!係!正! 呢個醬汁無得輸👍🏻

見到店內唔少人都食左好多碟青口... 原來佢地係叫左個 期間限定既青口薯條任食餐(90分鐘)!
一問之下.. 員工表示任食餐既青口仲有另一款醬汁可選:: 意式茄醬🍅
下次都想黎食呢個餐! 主要係想試埋另一款青口既醬汁🤤好有期望

巴馬火腿牛肝菌意粉🍝 一上枱已經有濃郁既牛肝菌香啦~
Parma Hams食落夠香, 同成個意粉都幾夾!

本來聞到咁大陣味仲怕牛肝菌會好重口味, 好彩又唔會, 食落係適中架
中間仲有唔少洋蔥, 索滿醬汁, 覺得加左洋蔥落去成件事真係唔同晒! 不過呢一碟對我黎講略嫌油左少少

最後既主角:: 勁大份勁多芝士既RIBS!! (燒烤醬豬肋骨配薯條, 熱溶芝士🧀)
芝士控既我表示開心到傻... 好驚喜🧀🧀🧀
係成份RIBS都鋪滿厚厚既芝士忌廉汁

忍唔住先清晒D薯條先.. SORRY呀茄汁今次白白浪費左你喇🥫
因為薯條沾芝士再加BBQ Sauce已經好完美... 今次用唔著你喇 >v<


Ribs唔係勁淋個隻口感, 我自己就鐘意個D烤到好淋.. 一切即散開個隻口感
不過同行朋友反而鐘意呢種多D, 覺得有返肉既質感
佢個sauce真係再一次係個靈魂!👻
你見到咁鬼大pat芝士以為會好漏? 佢又唔會...
我地食到最後清晒D薯條同Ribs都唔捨得停... 仲不顧儀態咁將碟上既醬汁都吃光光...🙊

最後, 我覺得我地兩個既餐飲都揀得好岩...
2杯都係熱茶.. 食到咁飽飲返啖熱茶消滯係最舒服~
(後)我很愛的 清清的:: 四季青鐵觀音
(前)朋友叫的:: 玫瑰黃金桂

P.S.食完都忍唔住做下港女, 影返幾張文青相先~
實在太鐘意綠色, 平時日日困係OFFICE... 難得可以對多D植物, 心情真係會好D : )

仲有, 坐呢度既窗邊位雖然張枱係細D... 不過可以望到店外
好多人放狗.. 見到勁多可愛既細狗 好開心!!
而呢間CAFE其實有戶外位, 係歡迎帶埋寵物黎架!
成個感覺好和諧~ 好似暫時遠離左塵囂咁😌



店家: Aldou Cafe
地址: 元朗馬田路38號怡豐花園3號地舖
Shop 3, G/F, Yee Fung Garden, 38 Ma Tin Road, Yuen Long
電話: 2619 9933
營業時間: 星期一12:00-17:00, 18:00-22:00, 星期三至日12:00-17:00, 18:00-22:00
Openrice主頁Here