成都•芙蓉城精緻名菜+無敵海景🌃 [映水芙蓉@尖沙咀]

相約媽媽食晚餐. .一定係揀中菜 XD 因為佢最鐘情中菜啊~~
朋友介紹位於海港城海旁位既優雅川菜餐廳 – 映水芙蓉 🏙
今晚果然無令我地失望.. 仲令我地好enjoy呢 !! : )

初頭都驚川菜未必岩口味.. 因為平時食開既都係較大眾化既粵菜
加上我地兩個都唔係食得辣之人.. 更加驚會無啖好食😓
但呢度菜式選擇好多好廣… 當中真係有唔少辣菜式, 但唔辣/微辣既選擇都唔少
加上咁樣黎食下個新鮮感真係好大, 見識到好多其他中菜廳唔會見到既款式 !!🤩


餐廳係正客運碼頭旁🚢 飽覽維港海景 ..
以前揀餐廳唔會理環境氣氛.. 但人大左先體會到用餐環境既重要性👆🏻
係呢度望住個大海景, 加上我地~6:30pm已入座.. 望住個天慢慢由淺藍變黑, 實在覺得心情舒暢😌


座位同座位間既距離好足夠, 枱面亦都夠大好闊落, 成個裝修充滿簡約古典美
而員工既服務係一流… 佢地主動加茶既程度 應該係我成世食過餐廳入面最高分既一間😆
加上面帶笑容, 要叫人幫手時基本上1-2秒內已即刻有人會過黎幫你, 非常抵讚 !

未叫野食前, 員工先俸上餐前酒, 前菜同茶品..
今晚既餐前酒係Lychee Martini, 酒味出既同時 荔枝既果香味亦同時滲出, 幾清新的一款🍸
前菜係糖醋蘿蔔海哲, 呢個除左有開胃作用外, 食辣野時更加發揮到作用 !

敲糖棒棒雞 $188
一向都唔係好食得辣既媽媽同我 .. 因為見到呢個好評實在太多, 加上真係幾乎每一枱都有叫.. 於是覺得非叫不可😂

本身已經醃香左既雞肉+甘筍上, 係一個載住辣椒油既手造糖衣模, 晶瑩剔透 好靚💎
上枱後, 員工會將糖衣吉穿再將辣椒油同雞肉,甘筍撈勻

然後一食, 覺得有陣麻味出緊黎 但係唔算辣, 所以好開心咁連食左幾件
然後就黎料了 , 開始辣到咳😂 呢個時候就係前菜大派用場之時
有助解辣… 解左後.. 我地又開始繼續食棒棒雞無限loop個步驟😂

終於體會到咩叫 “辣得過癮”.. 就係即使覺得好辣頂唔順但都好想繼續食😋而且加上左糖衣既甜味 唔係齋辣🌶
(我真係第一次咁有食辣既決心.. 平時好快放棄.. 今次我地二人清晒呢一碗😋)
呢一款真係辣得過癮兼非常傳統既四川菜.. 真心推薦比各位食辣或唔食辣既朋友🌶🌶🌶


櫻花蝦米湯蕃薯苗 $148
非常溫和的一道菜, 完全可以舒緩返棒棒雞的刺激感😂
話說米湯係對身體非常有益既食物.. 有滋陰功用.. 而呢一道既米湯好天然
飲得出無加任何味精, 蕃薯苗夠嫩同淋身, 加返櫻花蝦令成碟菜味道豐富返好多


香芒山葵蝦球 $268 (~有7隻蝦)
用上傳統既中國山葵, crossover沙律醬及芒果粒, 幾樣野竟然match到 !😍

微微炸香左既蝦幾大隻🍤咬落夠彈牙, 每一隻都沾滿山葵沙律醬
可上香甜既芒果粒.. 一整碟都令人食慾大增


螞蟻上樹 $138
又一個傳統四川菜式, 惹味既醬汁充分索入每一條粉絲度, 醬汁味道適中, 剛剛好, 唔會過咸或過淡

加上適量肉碎, 炒得剛剛好 幾乾身, 整體做得不錯~


最後雖然係好飽… 但係都覺得係要試一試四川既甜品既..
非常有代表性的是 紅糖糍粑 $118
之前係其他餐廳都有食過.. 但可以肯定呢度既做法同口味最正宗
半煎炸的糯米 淋上香濃既紅糖漿, 面頭再灑上炸脆左既藜麥同桂花碎
口感幾豐富, 軟糯中帶香脆感, 味道就較香甜~

係上甜品既同時, 員工亦俸上餐廳自家製既Petit Four ~
完完全全係意料之外啊~~ 一間川菜館竟然自己做朱古力!!🍫
兩款口味分別係 辣椒味 同 四川紅茶味, 會唔會太特別 !
食完棒棒雞後本來對於辣味野已經有少少戒心🙊
但一試.. 就覺得好彩有試到..
辣椒味朱古力本身可可味濃郁, 食到最尾先feel到陣香辣味湧出黎🌶
但放心 唔係辣到跳舞個種.. 只係有種辣既刺激感 ~
另一款四川紅茶味 我地更加鐘意☕
真係有紅茶既甘香味 !! 非常好味 !!


今餐真係好有驚喜.. 最緊要係媽媽食得滿足😊
一齊挑戰辣菜式.. 一齊睇海景.. 然後員工又令我地好滿意開心..
成個用餐體驗都令我地覺得物有所值👍🏻
之後絕對會再約埋爸爸弟弟再黎食飯 : )

店家: 映水芙蓉
地址: 尖沙咀廣東道3-27號海港城海運大廈2樓OTE 201號舖
Shop OTE 201, 2/F, Ocean Terminal, Harbour City, 3-27 Canton Road, Tsim Sha Tsui
電話: 23882008
營業時間: 星期一至日11:30-15:00,17:30-24:00
Openrice主頁Here