手工製作麵包店🥐 [Share le Pain@旺角]

呢間黎自台灣既手工製作麵包店 .. 一開張個時已經聽朋友提起過了
因為佢同我地熟悉既台飲店Sharetea係同一集團架, 所以係呢間麵包店都有飲品賣~



今日同屋企人黎開MOKO 經過, 就順便望下D麵包啦~
唔望尤自可, 一望大件事XDD D款比想像中吸引好多, 唔小心係度流連左好耐lol


最後仲買左D麵包做第二朝早餐~
因為屋企人 麻麻地甜食, 而之前聽朋友講 呢度好多款包都係甜款黎
但今次黎 見到有唔小新品 都係咸款黎架… 岩晒家人既心意


酥烤羅宋 $24
呢個係媽媽指定要試既~XDD
外貌平平, 食落係滿口芳香~~ 麵包成分有 雞蛋, 牛奶, 牛油同奶油
難怪會咁香, 而佢既口感係偏向實淨, 而唔係鬆軟~
鐘意有咬口既朋友 應該會鐘意呢款 : )


章魚大哥 $28
呢個係我揀既~~XDD 好明顯係比佢外表吸引住
雖然材料 只係簡簡單單既香腸同肉鬆, 但最得我歡心!
而且肉鬆仲夾有海苔 ~ 食入口幾重咸香味, 好惹味
而章魚眼其實係朱古力黎既~ 但… 由於我地係放第朝 再焗熱佢黎食… 所以, 已經溶左😂


香菇麻糬包 $22
好可愛既香菇造型的, 係唯一一款我同媽媽都話要揀既款式 LOL
呢款係大家都一致好評 ! 面頭既可可粉 唔太甜
重點其實係餡料::: 黑芝麻醬同麻糬 !!! 芝麻醬好濃郁 !
麻糬夠煙韌, 但如果麻糬再大件D就好喇!!!


薯頭 $24
呢個真係超搞笑~ 就咁睇真係好似一舊薯仔XDD
面頭既同上面香菇一樣, 都係可可粉黎~
而入面就有好多馬鈴薯粒! 而且仲夾雜住火腿, 粟米同洋蔥
整個配搭很不錯! (個人覺得如果再加埋黑椒粒調味, 一定會更加惹味~~)


最後呢一個, 我覺得係一定要食架 :: 芝士金磚 $19
係… 雖然呢款比起其他款式, 好似係普通左D…
但係芝士控一定會好鐘意佢
係車打芝士醬同牛奶方包既結合~
方包加入左牛奶 所以特別香軟, 面頭搽滿左店家自家製芝士醬, 焗熱後特別香!! 大推介



我地全部切成4份 全家人分黎食xdd
當日我同媽媽一人幫襯左一杯野飲~


媽媽叫既係:: 鮮醇芋頭奶 $36 (menu寫左,, 係用台灣大甲芋頭架 !)
我地都覺得賣相好少女心💜 雖然紫色係好淡, 但咁更加唔使擔心有色素問題
一飲就飲得出無添加糖分, 係直接用芋頭打成鮮奶 再加芋頭粒!
口感好幼滑, 亦都不停飲到粒粒芋頭💜
而面頭既係鮮忌廉黎~ 搞勻埋既話 整杯口感會更加香滑, 但注重健康既話, 唔搞勻都OK~ 忌廉會一直留係表面 : )


奶蓋(甜芝士)極濃日式抹茶 $40
一飲就明白佢既 “極濃”唔係講笑, 抹茶既甘甜真係好重!!
什至乎… 濃到 我估唔係抹茶控既朋友 未必會接受到
好彩, 原來將奶蓋同抹茶搞勻返, 味道就易接受好多喇!!
會似返濃味版既matcha latte, 口感亦都不錯

p.s. 呢度既奶蓋真心做得很不錯, 咸香味重, 質地濃厚, 係高質奶蓋
(佢仲有得比客人揀藍芝士或甜芝士, 平常飲到既都係甜芝士, 所以.. 我都係揀返甜芝士 lol 下次先試藍芝士啦~XDD)

整體黎講, 飲品方面真心高質, 相信好多人都已經飲過都知
而麵包方面, 見到佢仲有其他新款式, 其實都好想試埋呢~ 可惜我地一家人食唔到太多..XD
雖然價錢偏貴, 但食落都幾開心既~ 下次再黎, 會試埋其他款!






店家: Share le Pain
地址: 旺角太子道西193號MOKO新世紀廣場MTR層M47及M48號舖
Shop M47-M48, 6/F, MOKO, 193 Prince Edward Road West, Mong Kok
電話: 37052599
營業時間: 星期一至日10:30-22:00
Openrice主頁Here