記得 第一次認識Vincent Willem Van Gogh
係好多年前.. The Starry Night呢幅畫 突然好受大家歡迎
個時開始上網搵呢位荷蘭畫家既故事 .. 雖然 最後佢既人生係一個sad ending
但係 再睇返佢既畫作, 嘗試代入返佢既世界 ..
覺得 如果佢離開之後係可以去到一個令佢最開心既國度既話, 其實都幾好
點解一直都咁想黎 位於1881 Heritage既Van Gogh SENSES
除左本身好鐘意梵高既畫作外, 更加因為呢間 梵高藝術體驗館
係全球首家 向梵高致敬既藝術概念店🎨
已經得到 阿姆斯特丹梵高美術館 既獨家授權
一踏入1881, 已經覺得Van Gogh SENSES個選址好好, 同充滿藝術氣息既1881好匹配
門口係用多個Macaron砌成既梵高自畫像, 一入到去其實係分左兩邊, 左邊係souvenir area, 右邊先係用餐位置~
我同媽媽見時間尚早, 未覺肚餓, 所以就去睇下souvenir先 (結果都睇左好耐下🙈)
想講呢度既product每一件都設計得好有心思同埋手工好精細
同店員傾開先知 原來有唔少都係直接由梵高博物館引入架..
同時亦有店家自家開發既產品 : )
而且product range都好廣.. 由食用得既朱古力, 糖果, 茶葉
去到小擺設例如音樂盒, 杯, 茶具, 花, 絲巾 同手錶等等都有
睇睇下真係會好想買.. 但因為價錢都唔係平, 所以最後我地都好叻咁忍到手XD
終於真係入餐廳喇 : ) 成間餐廳其實係一條長長既圓拱型setting, 幾特別
而牆身上就會見到梵高大師既著作, 例如:: Wheatfield with Crows, Sunflowers等等
向外個邊既窗邊就放滿紫藍色既花,, 成個氛圍都好有藝術感
但最令我同媽媽驚嘆既其實係:: 枱面 !XD 每個位既枱面上都有呢個圓形框框要黎放餐碟架
然後每個框框都唔一樣架, 係用緊梵高唔同既畫作, 勁靚呀😍
呢度夜晚供應a la carte items + 2個set既選擇 ~
我同媽媽就散叫左幾款試試味 : )
首先黎既係超有心思 (份量亦都好足)既餐前法國麵包
一共有3款, 員工好仔細咁逐款簡介下~
3款分別係:: 法式傳統蔥油包 (我同媽媽都係最鐘意呢一款!! 香蔥份量看似唔多,但味道好出, 仲有海鹽味都好夾)
無花果合桃包同亞麻籽牛油麵包 (呢一款我其實都好鐘意😆外皮煙韌, 內裡就非常非常濕潤~~)
餐包另配海鹽牛油, 想食重味少少既不妨塗埋呢~
三文魚他他配牛油果及蜜糖芥末醬
平時唔多食三文魚既我.. 都覺得呢個唔錯, 因為佢既牛油果味夠清新
加上蜜糖芥末醬份量都幾適中, 所以三者夾埋一齊個效果係唔錯呢
作為前菜亦都好夠開胃
青蘆筍湯配帶子及藜麥
呢個湯超有驚喜啊!! 帶子同藜麥一早已經放好係碟上
而青蘆筍湯員工會上枱後先即場幫你倒出黎呢~ 避免將以上兩者浸淋晒~
青蘆筍味好突出同埋好fresh, 估唔到會係咁好飲~
帶子煎得夠香, 而藜麥就幫助增加口感, 成個湯都好滿意啊~
等左一陣… 我同媽媽既主菜就黎喇 ^~^
釀法國鵪鶉配風乾豬腩肉及五香葡萄酒汁
話說平時比較少食鵪鶉呢樣野, 都有少少擔心自己未必接受得到
(但後來上網翻查返先知, 原來鵪鶉係好健康既食物, 蛋白質豐富之餘
脂肪含量又小!! 食多左都唔怕肥的~)
佢體積相比起雞會細隻D, 但食落個肉質原來都幾好, 幾嫩滑又幾多肉汁
呢一款我同媽媽都覺得黎到既話就要試喇, 因為真係幾特別, 唔係度度食到
鵪鶉入面 放滿左多樣stuffing, 味道好惹味, 餡料好豐富~
(有D豆, 肉碎, 蘿蔔絲, 仲有好多好多其他食材… 我地都係第一次食🙈 唔係好食得出係咩黎, 但係又覺得有少少中東風味mix法國菜咁, 好特別!)
另外仲有D炸薯絲做拌碟呢~ 好脆口!
另一款主菜我地就揀左:: 烤美國肉眼配馬鈴薯蓉,甘筍及燒汁
呢個個份量同頭先既釀鵪鶉差好遠呢~! 呢個細份好多架
想叫既朋友要留意下~!
不過肉眼本身質素高, 所以肉汁都幾豐富同埋牛味都出
但對比起黎 我地都係覺得岩岩既釀鵪鶉會特別D(同埋份量多D!XD)
我地兩個將兩份主菜share食, 原來已經會好好好飽 @0@
但係仲有甜品… 又唔可以唔食架嘛😆😆
朱古力布朗尼配雲尼拿雪糕
Brownie雪凍左, 係偏硬身的質感~ 鐘意佢味道唔會太甜
同埋面頭的雲尼拿雪糕係精髓~ 好香滑~
想講佢brownie底下的鳥巢好有心思, 係用朱古力砌出黎架
聽聞設計靈感正正就係源自Birds’ Nests呢一幅畫 ~
最後 仲有飲品, 係不可忽略的一環啊~
媽媽想飲茶, 就揀左:: Sunflower Bouquet $55
而我就叫左比較普通既Matcha Latte (hot) (忘了價錢)
Sunflower Bouquet超超超靚啊 !! 茶壺, 杯同碟都印有畫作Sunflower既圖樣!!
辣木葉, 蜜樹茶, 檸檬草
配上芒果蜜餞比我地, 同茶溝埋一齊都唔會怪啊~
本來諗住呢度做Latte都未必會做得好, 但又一個估唔到
質素係同咖啡店一樣呢, 抹茶味夠濃郁, 質感夠滑
(雖然無靚靚茶具係有D失望…. /^\ 想影靚靚茶具既話 大家記得一定要叫茶類啊!!!)
係一個充滿梵高畫像既環境下用餐, 配上精緻餐具~
食物同飲品都喜出望外, 加上員工服務好到位, 細心得黎又唔會覺得騷擾
係好有色彩既一餐 : )
店家: Van Gogh SENSES
地址: 尖沙咀廣東道2A號1881 2樓208號舖
Shop 208, 1881 Heritage, 2A Canton Road, Tsim Sha Tsui
電話: 26222887
營業時間: 星期一至日11:30-15:00, 15:30-17:30, 18:30-23:00
Openrice主頁Here
沒有留言:
張貼留言
歡迎留言分享 : )