之前係元朗食過一次之後 一直念念不忘的萬芳冰室…
係大埔都開左分店了~ 終於 有機會黎試試大埔店喇!
店面裝修同其他店一樣係走返舊式茶記路線, 格仔地板, 摺枱卡位
但最吸睛既應該係一邊牆上一大片”亂世佳人”海報牆~
(一見到呢片牆, 我呀媽就開始講佢地以前有幾鐘意睇呢套戲 XD)
食物方面都係好懷舊既茶記食物啊~
我同媽媽就叫左幾樣野一齊share食🥰
小食:: 原隻鳳尾蝦多士 $38(配薯條) 轉配沙律+$3
話說當日落單之後無耐, 員工就過黎通知薯條賣晒.. 問轉沙律得唔得
雖然真係好想食薯條但佢賣晒都無辦法, 唯有OK啦
最後埋單先發現 因為*被迫*轉左沙律 所以都要+$3 @_@???? 呢個做法好似唔太合理~
講返份蝦多士, 的確係炸得唔錯既, 脆口得黎係乾身架, 完全唔會油淋淋~
值得一讚!! 蝦味亦都夠突出, 係幾好味既
不過呢款舊式沙律就真係唔係我杯茶… 食左一啖就無再食.. 唔係太鐘意呢種沙律醬既味道
瑞士汁雞翼撈丁 $34
雞中翼連翼尖, 2隻都好大隻 好好肉, 同埋佢真係醃得夠入味同埋夠淋身~
撈丁同瑞士汁既份量都好適中啊~~ 整體黎講係好食
什扒飯 (太陽蛋, 香腸, 豬扒, 牛扒) $58
最後係呢一個, 望個賣相無乜期望, 但食入口又估唔到每個位都做得唔錯!
太陽蛋同香腸相信都唔需要多講
想講既係2件扒都高!質! 薄切豬扒煎得好香, 食得到油脂感同時又唔會太膩
而牛扒雖然唔係咩名貴貨, 但係牛味同胡椒味夾得幾好, 兩種味都一齊出到~
呢一碟雖然價錢唔係平, 但質素確係值得encore既一碟!
整體黎講, 我覺得係要識叫野食😂
因為佢某D飯款都幾貴, 但係有D野又會抵叫返D, 好似常餐, 出前一丁個D咁都抵叫既
朋友share食既話, 最好唔同款都叫D, 拉返勻個價錢 又可以試多款, 咁樣性價比又會再高D啦~
服務方面, 主要有兩位樓面姐姐serve~ 一個就好好禮貌 好主動幫手
但另一個就叫極都唔應 又無乜禮貌... 希望大家都遇到好禮貌個位姐姐啦
店家: 萬芳冰室
地址: 大埔寶湖道1號富盈門商場地下2號舖
Shop 2, G/F, The Golden Gate Shopping Mall, 1 Plover Cove Road, Tai Po
電話: 37052688
營業時間: 星期一至日7:00-21:30
Openrice主頁Here
沒有留言:
張貼留言
歡迎留言分享 : )