匯聚傳統與創新的順德菜式 [鳳城1954@MegaBox]

今日黎MegaBox有重要任務XD 但做任務之前.. 一定要食餐好既, 先有力出發 : D

一去到7樓 就比呢間鳳城1954吸引住 … 除左因為門面好大同好光猛外..
佢裝修都幾別緻.. 成個配色都比人好舒服同柔和既感覺..
再望望下午茶餐牌.. 竟然係用鳥籠裝住精美可愛既點心..
(同我心目中既好古舊既鳳城.. 都好大出入下 @_@!)



同朋友們好快就決定要入黎試試呢間出名傳統順德名菜既酒家呢..
估唔到入面既裝修都一樣係好Trendy .. 而且野食款式係超超超多
除左有我地係門口見到個款鳥籠Tea Set之外, 點菜紙上面仲有大量點心, 湯類, 小炒, 粉麵飯, 蒸點炸物甜品…etc.
但係最吸引我既 反而係 “鳳城名作”, 呢個category入面既款式都係最經典既順德菜.. 平時真係未必食到呢..

除左傳統中國茶葉外, 呢度竟然有 玄米茶 可選 @@~

鳥籠下午茶餐$128/兩位用
首先.. 估唔到一個咁靚既雀籠Tea Set只需每人$64, 比起好多其他中式酒樓既tea set都平~


我同朋友一見到最頂層既三個可愛造型包包, 已經忍唔住要將佢地食落肚😈
3款包分別係: 流心奶皇包, 流心抹茶奶皇包同叉燒包 ~
我試左流心抹茶奶皇包, 意想不到地好食喎..! 抹茶味一D都唔假, 甜度幾適中
包質地又夠軟熟, 成個配合得幾好!

中層有 蝦餃同 雀仔造型既鳳梨酥.. 我鐘意個蝦餃因為有好大隻🦐

最底層既係 榴槤糯米糍同埋 紫薯奶皇丸, 榴槤我當然無試到😂
但紫薯奶皇丸比想像中足料好多, 咬落去係濃厚既餡料~

仲有好香甜既 芒果布甸呀~~~ 面頭配上應該有略略焗香過既糖絲, 好鐘意☺

龍袍四季豆(蛋黃醬)$56
呢一個.. 我相信係本身唔食四季豆既朋友都一定會食~!!

因為… 每條四季豆都比咸香又脆身既蛋黃醬包住再炸香….
實在係太邪惡.. 但又真係抗拒唔到佢.. 好易一條接一條咁食晒.. 非常有蛋黃香

3D車仔腸粉(混醬)$36
食物賣相唔多唔少都會影響胃口, 見到架咁得意既車仔放住腸粉, 令人對佢食慾大增 : D
不過佢唔係得個樣, 味道係無令人失望, 腸粉夠滑身 醬汁比例同份量又剛剛好


黑松露水晶波$39
呢個有意外驚喜 因為多數呢D款都唔使旨意食得出有黑松露
但呢個松露味竟然好出 🖤 皮亦都好薄身



脆皮咕嚕肉$118
第一次見咁特別既咕嚕肉呢~ 將醬汁同肉分開上 醬汁用菠蘿盛載


而咕嚕肉係用炸粉包住黎炸香
加埋醬汁分開上 食入口保持到鬆脆


1954蝦多士(2件起) $15/件
呢個真係經典小食黎! 又真係唔係度度都有呢種正宗既蝦多士食
呢個係必點🌟
好脆口既多士 比想像中少油 蝦肉非常厚身同彈牙.. 邪惡又正正🤤


完全唔會諗到係度會出現既食物:: 蒜蓉牛油雞翼 $56/4隻 (伴蝦條)
我覺得雞翼控係唔可以錯過呢一碟
係有水準的一碟 雞翼炸得超惹味
而拌碟既蝦條竟然比朋友搶晒黎食LOL

紫砂茶壺燉白肺湯$58/位
食完熱氣野 飲返啖湯是常識吧😂因為我地都多人 所以叫左兩款湯呢
朋友大愛呢一款 我都覺得唔錯, 飲到杏仁味但唔會覺得難頂

紫砂茶壺燉螺頭湯$58/位
兩款湯入面我更加鐘情呢一款 好補既感覺
想講兩壺湯個底都有好多渣架 唔好唔記得食晒左呀!!

總結:: 成餐食既野都有點意想不到
一 :: 估唔到會係間酒樓入面食到d新式點心同甜品
二 :: 平時好少食傳統既順德菜 今日一試試到幾款仲要覺得幾岩口味點解平時會無乜食架?
三 :: 第一次係酒樓係飲玄米茶😂
成個用餐經過都幾amazing 😂 相信都會再黎食飯 試多d新野同順德菜~

店家: 鳳城1954  Fung Shing 1954
地址: 九龍灣宏照道38號企業廣場5期MEGABOX7樓6號鋪
Shop 6, 7/F, MegaBox, Phase 5, Enterprise Square, 38 Wang Chiu Road, Kowloon Bay
電話: 39052299
營業時間: 星期一至五11:00-23:00, 星期六至日10:00-23:00
Openrice主頁Here