燒味FANS不容錯過的風味店 [Chop Chop 食神叉燒@北角]

有睇過星爺電影《食神》既朋友.. 相信都唔會忘記 戲中出現過既 黯然銷魂飯🤩
而呢一碗飯既原型創辦人 兼係電影中客串出現過既 戴龍師傅👨🏼🍳
正正就係呢一間CHOP CHOP食神叉燒既 餐廳顧問!!
令人特別期待呢碗 正宗既黯然銷魂飯🤤



店鋪走懷舊飯堂風 好特別呀!! 好似真係去左上一個時代咁😆
高樓底再配上長吊燈都好得意


店外面都可以望到誘人既燒味😍

MENU都勁懷舊!!

食神 黯然銷魂飯+湯 $80
價錢真係唔平呢...
叉燒飯賣相不錯, 可惜太陽蛋略嫌唔夠流心同大隻🍳
叉燒係每日係店內新鮮燒起既
而且用上腩肉部位 … 肥瘦好適中呢 !!

本來以為佢會係好腍身個隻口感 但原來唔係喎~!! 佢係屬於有咬口既口感
朋友就覺得偏硬身… 而我就幾鐘意 呢種有咬口既感覺 !
(不過聽聞唔同時段黎食有機會食到唔同既口感, 因為會受叉燒出爐時間所影響)
叉燒既面頭燒得好香又帶有少許燶邊… 好好送飯…🍚

而跟餐既湯係排骨菜乾湯, 不過不失~

燒味拼盤 (揀左: 燒鵝, 貴妃雞&脆皮燒腩) + 玫瑰叉燒 $184
其實餐廳本來最多係三拼架咋.. 但我同朋友又實在太想試埋另一款叉燒 (叉燒控XDD)
所以試下要求加錢, 叫店家比個四拼我地.. 又真係得左 ! 😛

比較推介的兩款係::脆皮燒腩 & 燒鵝
燒腩 係意想不到地好食!! 外皮燒得勁香脆🤤🤤
外皮下, 脂肪同瘦肉既比例係我最欣賞既地方…脂肪唔會過多, 三層夾埋個口感都剛剛好 !
而且食入口感覺到油脂香, 又唔會過膩, 超正 ! 😋

而燒鵝雖然無燒腩咁出色, 但係一樣係水準以上
鵝味好突出之餘, 食入口唔會太多油, 外皮少少脆口, 同鵝肉夾埋一齊非常夾~👍🏻

至於另外個兩款就有少少失望…

玫瑰叉燒:: 比起黯然既腩肉位, 呢一份多左既係更加豐富既玫瑰露香~ 但口感就兩者都差不多

貴妃雞:: 其實肉既感覺都幾嫩滑, 係唔錯的, 不過就無乜好特別既驚喜咁解!


我同朋友分別叫左 鹹檸樂$25 同埋 熱檸蜜$23
鹹檸樂好似唔係度度有得叫 @_@ 第一次見 幾得意! 🍋

最後想讚下員工既服務~ 一入到黎已經覺得佢地好好笑容 ☺
令你覺得好似行入左一個好熟悉既地方咁XDDD
到落單時佢地又會同你講下笑, 大家好似老街坊XDD
成個用餐都幾舒服🙂 燒味FANS值得一試呀~

店家: Chop Chop 食神叉燒
地址: 北角宏安道18號地下3號舖
Shop 3, G/F, 18 Wang On Road, North Point
電話: 36187718
營業時間: 星期一至日11:00-21:00
Openrice主頁Here