識食一定黎食Lunch Set [炑八韓烤]

炑八韓烤 相信大家都唔會陌生.. 但我其實係第一次試佢既Lunch Set~~ (星期六, 日都有!!)


非燒烤類既選擇都有成10款, 價錢由最低$42起到最貴$88
重點係: 唔使收加一呀!~~~
(已經配有韓式海帶湯同前菜)
如果想加配飲品都只係需要+$6..仲要已經係有得揀士多啤梨梳打/荔枝梳打等等呢一類既特飲~! 就咁單叫要三十幾蚊架~


而烤肉類就有5大款~ 價錢由$96至$128不等, $128的當然係最珍貴的全牛肉餐♥
另外佢仲有一個$128既自選燒烤餐, 肉類5選2, 迷你流心蛋飯3選1
而所有烤肉餐都係附有韓式海帶湯, 紫菜白飯同埋無限添加既前菜同爐邊蛋!~~~



無記錯既話晚市食既爐邊款會係一邊泡菜蛋+另一邊芝士粟米
可能lunch set既關係, 無左芝士粟米 T^T 不過蛋都好好味hahah~
一坐低員工就會為你送滿一枱都係既前菜同湯~~ 感覺真係好豐富架!



雖然我係一個食唔到辣既人... 但係我其實都好鐘意食泡菜!
呢度既泡菜岩晒我♥ 唔會太辣 少少酸帶有少少甜味 yummy!
海帶湯... 我一定會飲晒佢 為左黎緊既燒烤打定個底~


我地叫左一個梅花肉餐 (厚切梅花肉, 炑八特製護心肉, 梨汁雞髀肉) $98
係一個豬肉同雞肉既配搭... 
對於梅花肉 個人黎講一直都唔係特別鐘意.. 雖然肉質係瘦中帶有油花 但豬肉既味道實在太濃了... 唔係我鐘意既口味~ 但應該係好合大眾既口味的!
而矜貴既護心肉 係我地既至愛♥ 點解話佢矜貴 係因為護心肉係位於每隻豬橫隔膜同肝之間既肉, 大約只係得200-300g既份量~~ 燒起黎好快熟, 肉味好濃郁, 口感彈牙! 而肉汁就鎖實晒係肉裡面, 真係好正~~~
雞髀肉就係一般既雞髀肉XDDD 只要燒既時侯比d心機就已經好好食

我地燒左一碗碗爐邊蛋食XDDD 燒到半生熟狀態真係好好食又好滑好濃蛋香味!!
但係其實係咪要係佢未熟之時將肉類混入去食架??
下次一於試下~~~!



另外我地仲叫左大蝦海鮮拉麵 $48 完全無諗過會有咁多料!
海蝦, 青口兩隻, 一路食仲會發現麵底收埋左好多蜆肉 同八爪魚仔!!
而右邊個pat白色,,, 一開頭我地仲以為係沙律醬/蛋黎....XDD
一食落, 原來係芝士溶黎架!! 實在叫芝士控好興奮XDD
但係平心而論芝士撈落個湯底食係唔太match..... =DDD
而湯底就係有少少咸+少少辣味, 可以突出返海鮮本身既鮮味~

加$6就有既藍天使梳打, 單睇賣相已覺賞心悅目 : )

飲落亦都好開胃 上層酸下層甜 要黎拌燒肉食一流 : )

我會形容今餐係手忙腳亂既一餐, 係主菜未上時, 已經一枱都係前菜任你食...食食下又要襯熱飲個湯
未飲得切個湯拉麵又黎到了... 再加埋燒烤既肉類同埋要處理爐邊蛋, 成個人把口同對手都會好忙架xdd 但係呢種忙碌好幸福♥ 哈哈哈
我覺得食野除左帶比人飽肚感外, 呢一種幸福感都好重要! : )
當然, 客人都好需要自律, 即使前菜同爐邊蛋係無限添加, 都應該要食得晒先好加~~~
呢餐咁豐富都只係每人$80..... 諗唔到唔黎食既理由>v<

不過有一個好多店家都有既共同問題... 就係冷氣實在太太太大了...
雖然知道燒烤店冷氣要調高d...但未免有點過大, 吹到個人會唔舒服呢! 呢一點絕對會影響客人既用餐經驗>__<
希望會有改善...

店家: 炑八韓烤
地址: 天水圍天秀路8號天一商城2樓2013舖
Shop 2013, 2/F, One Sky Mall, 8 Tin Sau Road, Tin Shui Wai
電話: 2555 1488
營業時間: 星期一至日 11:00-24:00
Openrice主頁Here