有新鮮感得黎又幾岩食既中東x西餐fusion餐廳 [Mezze@尖沙咀]

今晚朋友帶我去左尖沙咀一間仍然試業中既中東x西餐fusion餐廳
一聽到中東菜.. 老實講真係有少少卻步..
因為應該唔係太岩胃口.. 不過朋友好有誠意咁帶我黎.. 就即管試試啦


名為Mezze, 原來係阿拉伯話 "小食"既意思
一睇個menu都明白點解叫呢個名啦, 因為真係幾多小食供應~
而且見到有雞翼, 薯條, Nacho等等, 即刻覺得安心左XDD
起碼有D平時都會食既野~
(不過員工話佢地仲不停改良緊.. 所以呢個Menu都仲未finalize!)




呢間餐廳雖然係位於熙來攘往既赫德道.. 但係當你上左The Hart 4樓
再要推開多一度大門先至會見到餐廳
一踏入去, 係暗暗地既環境 配住有神秘感覺既電子音樂🖤
以黑色為主調既環境 加上大大塊落地玻璃
感覺好似去左另外一個空間咁... 同時亦可以暫時逃離下吵鬧既都市🌃

今晚我地坐呢個窗邊位, 可以居高臨下望下街景同人群
見到呢度仲有好多戶外位呢~
p.s. 員工介紹.. 原來呢度既大廚係由Marriott轉過黎, 呢度供應既都係佢既獨家菜譜, 聽到呢度我都開始安心d xd


Falafel $85
其實即係炸鷹咀豆餅!! 再配上中東式既香料🍃
全用鷹咀豆蓉加炸粉炸成既小食, 賣相唔算太吸引
但估唔到食落係勁脆口, 勁香同好惹味~!!👍🏻


而面頭仲有少少芝麻, 令到佢更加香口~
醬汁係配芝麻醬... 都幾杰身下, 個人覺得唔沾醬汁更岩口味~~

員工教我地用中東薄餅Pita Bread包住黎食: )
連份薄餅都好味呢, 厚薄適中得黎又有麥既香甜味🥙
呢份小食有中東風味得黎又唔會唔岩食, 推介大家一定要試!⭐


Chicken Wings $98
第一次試中東菜, 一定要起碼叫一個穩陣既款式XDD
呢個炸雞翼好高水準 每一隻都勁好肉同大隻... 外皮炸得酥脆
亦都唔會有想像中既重口味 : )
配上酸辣醬... 都幾辣下 唔食辣既話唔好沾喇~ 就咁食雞翼已經好好味

最後我地仲叫左個比較重中東style既Djaj Mahshi $158
係巴勒斯坦既菜式黎~


一上枱估唔到會咁大碟@@...
烤雞入面其實包住左黃油松子, 五香米同肉碎
呢一份真係充分體現到中東菜既特性:: 香料味突出, 飯粒比較細粒同粒粒分明, 顏色鮮豔
其實味道又無想像中咁難接受, 而且鐘意佢係烤雞既面頭落左好多蕃茄粒mix洋蔥粒
令到成份食物都有好清新同甜甜地既感覺!
而烤雞亦都好好肉, 不過略嫌唔夠juicy🐔
同埋食完呢個真係好飽下, 建議多d人一齊叫黎share食!!


呢度其實都有幾多酒類同水煙供應🥂 成個feel都好舒服同relax
特別要讚員工非常專業, 對食物既資料好熟悉, 又有禮貌!
令人食得特別舒暢 : )
平時食中餐/西餐/日餐/泰餐食到厭厭地既朋友,, 不如試下呢一種比較獨特既fusion菜啦 ~!

今次好好心機咁幫大家整左個去法指南::

尖東N3出口行去赫德道, 搵The Hart入口

搭lift上4樓

推開呢一度門

行多兩步就會見到餐廳入口

店家: Mezze
地址: 尖沙咀赫德道4號The Hart 4樓
4/F, The Hart, 4 Hart Avenue, Tsim Sha Tsui
電話: 3481 7718
營業時間: 星期一至四及日17:00-2:00,星期五至六17:00-3:00
Openrice主頁Here