工業邨內 吃一頓有山景陪伴的治癒午餐🥪 [FAMA@大埔]

之前聽朋友講過 .. 太平工業中心入面 有一間隱世CAFÉ..
初初都覺得想像唔到 XD 難得今日全日都得閒, 特登約埋爸爸媽媽 入黎試下 : )

明明坐火車/K12都可以黎到 .. 但撞正今日落雨.. 連平時慳家既爸爸 都竟然提議坐的士入去XDD
不過原來真係好近, 就係海寶花園, 梁省德小學後面 行5分鐘左右就到
所以食完之後我地都係行路返返去K12站 ~

一去到太平工業中心第2座門口, 看更已經好醒目咁 叫我地入等lift大堂按10樓
睇黎都有唔少人同我地一樣 weekend/假日特登入黎FAMA食野XD
所以看更都見慣不怪


上到10樓轉左到尾 就會見到田園風既門口, 證明已經到達喇 !!^^

好得意的, 落單有獨立一間房, 然後用餐位置就再行入兩步
係超級寬敞既空間啊 !! 一踏入黎 的確令人好有驚喜, 始終係香港 可以係咁闊落既環境食野 唔係一件易事 ..

重點係 望到窗邊竟然有大大片山景呀 !! 好治癒, 心情好寧靜 : )


然後 其中一面牆壁上 有投影機 投影一D休閒既節目, 隔離放左一個細細既書架, 有唔少適合小朋友睇既漫畫書係度

另一邊廂 就係靚靚既打卡花牆 ~ 可以坐係梳化上 慢慢影

再另一邊, 竟然有3部扭蛋機 ! 呢度的確好岩帶埋小朋友黎玩 ~ 在場亦見到唔小一家大細黎食野同休息 ~

坐左一陣 先發現呢度係自助形式架
由拎餐牌, 點餐, 斟水, 到收盤都係自己黎 ~ 我諗呢樣係呢一度食物價錢較平既原因 ~
而我亦都幾buy, 因為除左平D之外, 其實感覺亦都free D, 唔好有人望實你坐左幾耐, 又無人會理你叫得多定少野 XD

我地今日都比較肚餓.. 所以叫左3個主食~
比錢落單後, 員工會比pager你, 響就去返同一個地方拎餐


意式車厘茄珍珠帶子扁意粉 $68 連飲品
醬汁開胃, 亦都幾多蕃茄粒~ 同埋都有幾多珍珠帶子, 不過由於size真係偏細, 有時食左都唔太覺 XD
扁意粉軟硬度適中, 整體味道不錯

珍珠帶子

呃Like全日早餐 $98連飲品
一見到就即刻明白點解名叫 “呃Like全日早餐”, 賣相的確好吸引呢 !!
內容分別有:: 豬柳X2, 雞肉腸X2, 黑松露炒蛋, 炸薯餅X1, 煙三文魚X1, 焗蕃茄X1, 牛角酥X1, 茄汁豆, 沙律菜


想講豬柳煎得好香好入味, 超欣賞 ~ 同埋雞肉腸都好好味

其他食物質素都中上, 整體係很不錯, 而且佢既沙律菜份量都唔少, 中和返飽滯感.. 都幾推介大家可以試試 呢份不錯的all day breakfast啊

呢兩個set我地都係揀左配熱奶茶呢~~


FAMA牛漢堡(8 oz)配薯條 $98連飲品+$15轉玫瑰花香草茶(原價$27)
一定要讚 薯條好好味 !! 熱辣辣上枱, 同埋唔會overcook好乾, 薯味突出, 很不錯

漢堡幾足料, 有芝士, 菠蘿, 原片洋蔥, 牛肉, 蕃茄同生菜 ~
牛肉夠厚身同juicy! 可惜既係無乜調味, 所以連肉味都無被提出… 呢點比較失色呢
不過其他配料都配合得唔錯, 特別欣賞菠蘿又厚又甜, 同埋洋蔥原片上, 炒得幾惹味

呢個set我地加左 $15配玫瑰花香草茶
係幾香既玫瑰花茶啊! 呢度有樣野好, 就係連熱水都係自助斟
所以呢個花茶我地無限refill左好多次

Lunch Set有包埋餐湯~~

坐坐下 我地見到有客人玩緊board game, 一問之下先知 原來可以去落單房個度 問員工借架呢~
(借之前要放低$100按金先, 還返個時就可以拎返, 以確保返board game唔會被人破壞)

所以我地就借左好多年無玩既飛行棋 !! (我爸媽淨係識玩呢個, 其他唔識玩)
果然比起一般café 呢度既棋係比較新淨 !
一玩玩左成粒鐘.. 途中都見好多小朋友係度玩得好開心 ~


呢度真係一個放鬆心靈既好地方 ~ 下次會再黎過 : )

店家: FAMA
地址: 大埔汀角路55號太平工業中心第2座10樓A室
Flat A, 10/F, Tai Ping Industrial Centre Block 2, 55 Ting Kok Road, Tai Po
電話: 60519209
營業時間: 星期一至日11:00-22:00
Openrice主頁Here