大件夾抵食仲攞過獎既金牌本土西餐廳😋 [金船長@大角咀]

以前係大角咀返工既時期.. 最鐘意就係放左工黎金船長嘆下..~
而家諗返都覺得幾懷念個段日子呢! (雖然係OT得好勁......)



店鋪環境同以前一樣, 仍然係帶有懷舊浪漫情調既氛圍😌
純黑既牆上 好有心思咁畫左各樣招牌菜既形態~~
令你大約知道食物會係咩構造😉好睇得黎又實用!


招牌黑松露pizza 可能好多人都好熟悉了🧀🧀
(全名好長XDD 黑松露菌醬意式馬斯卡普芝士夾心比薩)
有得揀6吋 ($108) 或9吋 ($168) 呢.. 大食既我地當然係叫個大既 >v<
鐘意松露同芝士既朋友.. 強烈推介一定一定要試呢個!!!
熱辣辣咁上枱 已經聞到濃烈既松露香散發出黎🖤
用叉拮落去🍴完全感受到薄餅既鬆化 (而唔會散開晒)
薄餅面頭鋪滿芝士粉.. 係勁香而且唔會膩既味道🧀
同夾係中心既松露會融為一體呢!!
看似簡單既配搭...炮製得十分出色😋😋
鬆脆加融和~~ 我同朋友每人ko三件都仲想食!


香煎法國鵝肝(3安士)蘋果沙律 $138
勁耐無食既鵝肝🤤其實呢度既野食堅係大件夾抵食
從來無見過餐廳比咁大件鵝肝架！

鵝肝底下係軟綿既多士🍞鵝肝口感略嫌唔夠入口即溶
但係佢既鵝香同油脂感已經令我好滿足🤤🤤


法式焗田螺配法式多士 $68
田螺既口感估唔到幾嫩呢!
法包已經沾上碟面既橄欖油... 但覺得如果可以將橄欖油分開上既話會更好呢~
因為對我地黎講麵包沾得太多油了.. 如果可以比客人按自己喜好去沾會更好~~
而食法方面::: 將田螺放上法包上一齊食係層次最豐富!!


凱撒沙律$78 +$30 配parma hams🥗
再一次重申 呢度既食物真係超大份
難怪平日夜晚都keep住full house
沙律菜同醬既份量都係好多!!! LOL
我同朋友覺得食極都仲有😂

焗蜜糖雞翼 $45 竟然有5隻呀!!
外皮好香脆 但覺得蜜糖味可以再入味D!


重頭戲::: 美式燒豬肋骨配BBQ汁 (可選配意粉,飯,薯蓉或薯條) $158
已經太飽既我地揀左薯條🍟
完全無諗過會咁大份呀... 比起一般出街食既更多
肉質夠軟身, 亦都透徹地索晒bbq sauce既惹味😋
覺得夠3-4人食... 咁既份量先至$158, 堅抵食
另外薯條都好味呀😍脆得黎唔過乾~

加州牛油果沙冰 $32 質地滑身🥑
應該加左唔少牛奶入去 所以好滑呢!🥛
無想像中的滯同杰身 比較似奶昔~ 都唔錯

好耐無飲既 黑牛$30😍呢個真係心心眼
而且可樂上既係朱古力雪糕球 好正~~~

食完呢餐我同朋友真係飽到傻左咁離開... XDD
成餐最欣賞既始終都係餐廳既得獎名菜-- 芝士黑松露薄餅!!!
除左食材吸引之外, 你真係感受到廚師既用心, 對於材料比例同烹調時間拿捏得完美, 先至會有咁吸引人既味道同口感😋
而且係其他地方真係唔會食到呢一款, 所以都幾推介大家黎試試!

同時亦好欣賞店家提供多元化既食物比顧客選擇... 什至有得自選車仔意粉...有新意得黎又比到客人高d自由度~
希望咁多元化又咁高性價比既本土餐廳 可以繼續生存落去!!💪🏻

店家: 金船長餐廳 Golden Captain Restaurant
地址: 大角咀大全街55號3A
Unit 3A, 55 Tai Tsun Street, Tai Kok Tsui
電話: 2381 7369
營業時間: 星期一至日11:00-23:00
Openrice主頁Here