大埔又有好野食!! [大埔Chef Restaurant]

自鈞一居結業後...係大埔覓食又少左個好選擇...
不過呢一區真係好多好多又抵又好味既小店
今次搵到呢間肥哥哥餐廳就係一個好例子~!! *v*



意想不到地, 餐廳內部裝修得幾靚@@....
燈光偏暗, 有少少高級西餐廳既氛圍, 地板同牆身都走水泥工業風既簡潔路線~
最重要既係枱與枱之間有足夠既空間分隔, 提升返私隱度^.^




食物選擇唔少呢~~ 有漢堡, 薄餅, 意粉, 沙律, 海鮮同扒類, 樣樣都好想試..好難抉擇=DDD

好彩同行友人已經幫襯過幾次, 由佢黎揀出心水食物~~


一落完單餐湯已經即刻送上, 係熱辣辣既牛肝菌忌廉湯
未飲已經聞到好出既菌香味~ 飲落更突出, 湯質好幼滑
不過我個人鐘意口感更加creamy, 濃厚既西湯~~


朋友推介的 黑松露醬蘑菇闊條麵 $62 (份量: 8/10, 味道: 8/10)
同岩岩飲既湯好似有少少似.... 哈哈哈
無諗過呢個價錢會有咁大份, 好充足既麵條同蘑菇!!
黑松露醬味道好濃, 而且非常creamy呢!! 亦都食得到牛油既香味
味道濃得黎醬汁唔會over地多, 唔會咁易食滯, 非常適中 : )


香煎紐西蘭西冷牛扒配燒汁(或黑椒汁)配薯菜(或飯/意粉) $68 (份量: 7.5/10, 味道: 8.5/10)
牛扒亦係黎呢度既必食之選!!!
西冷扒用上黑椒粒黎調味, 有效帶出牛扒既香味
外層既香脆可以係相入面見得到, 內層竟然好完美咁將肉汁鎖實
連少少乾身都感覺唔到~~~ 好好好juicy既西冷扒!!

由於我係一個唔食得生冷食物既麻煩人, 所以提出左要9成熟呢個奇怪既要求XDD 不過佢做得到...佢真係做得到!!
平時無乜機會食得到真正9成熟既牛扒..多數都係會變左全熟,會變韌
今次真係喜出望外*v*!!!!

另外, 呢度既薯菜亦都比較特別, 菜就係普通加左黑醋既沙律菜
而薯, 就真係原隻薯仔上, 薯仔外圍就輕輕炸香左
介乎熱氣同唔熱氣之間XDD 但係清清地又脆脆地口, 幾好味~


最後上埋餐飲~ 朋友介紹呢度咖啡唔錯, 我都試下啦
不過我唔係愛咖啡之人~ 所以唔識評... 哈哈哈!

(題外話: 呢度播既音樂好岩我口味... 所以特別覺得好舒服 ;P)
以後開飯又多個好地方~ 
環境, 食物, 服務, 抵食各方面都above average~
不過唔熟呢區既人可能難搵少少... 要行到去火車博物館再轉入去呢~

店家: 肥哥哥餐廳 Chef Restaurant
地址: 大埔大埔墟仁興街29號華興樓地下
G/F, Wah Hing Building, 29 Yan Hing Street, Tai Po Market, Tai Po
電話: 3702 1836/ 3702 1839
營業時間: 星期一至日11:30-22:00
Openrice主頁Here