位於太和的Cafe首爾 --- 不過不失

6月頭啱啱去完韓國旅行 後遺症持續中 今晚決定要食返餐韓國餐! 望梅止渴 !!



位於太和既Cafe首爾 門面望入去幾靚幾精緻

夜晚7:15左右去到已經要拎飛等位, 我地排第7張, 但一拎完飛佢就開始叫號
一路叫好多人走左, 亦都好多人入到座, 原來入面都好多張空枱, 所以我地好快就入左去喇XD

入面環境幾好 木系裝修 坐得舒服 只不過係店仔太細 會同其他人坐得好近架

一坐低員工就會送上熱茶同泡菜, 芽菜
呢度d泡菜辣度拍得住韓國個d !! 不過實在過咸得太緊要...

樽野飲係檸七 $12, 係後尾食辣野個時頂唔順即刻叫黎飲既XD

呢間Cafe首爾其中一樣吸引我地入黎既就係佢有各式各樣既韓國地道菜~
由人蔘雞, 到炸雞, 鐵板烤肉, 芝士麵不等 *v*

我地第一樣叫既係無骨蜜糖醬油炸雞 $78 (味道: 6/10, 份量: 7/10)
本來抱住超級期待既心情等呢碟炸雞 點知一上枱 完全冇平時食韓式炸雞個種興奮 =.=
食落仲好似蜜糖版既咕嚕肉添 =.=...

失望!

佢另外仲有原味, 甜辣同芝士味... 不過我感覺到應該都會同咕嚕肉差唔多款..........

第二樣係我一向好鐘意食既韓式粉絲 $45 (味道: 6/10, 份量: 7/10)
不過不失啦.. 牛肉餣得幾入味既~ 粉絲一般 總係冇其他地方食到既咁好味...
不過其實都係一分錢一分貨 呢個價錢 係唔應該要求太高!

第三樣叫既係芝士炒年糕 $55 (味道: 6.5/10, 份量6.5/10)
發現我地叫既呢三樣野都係係小食分類入面 >v<

芝士唔多... 同埋成碟都係用微波燼翻熱拎出黎既... 所以芝士都硬硬地
不過呢個都幾辣下 所以食食下即刻叫支凍野飲 >w<
年糕唔夠煙韌 中間夾雜住幾片韓式魚片 個人黎講麻麻地鐘意

食到呢碟 已經開始意識到呢度既食物比較... HEA
睇Menu會睇到人流口水 款款都想試 但實物黎到總令人失望...
 
由於唔可以成餐都冇飽野到肚, 所以我地追加左一個芝士湯麵 $45+年糕,香腸 $8 (味道:7/10, 份量:6.5/10)

基本上係唔會難食既 雖然落得一片芝士 但每啖都會食到有芝士味既~
食到最底先發現原來都有幾多年糕小片下, 都係唔夠煙韌... 腸仔係司華力腸既味道 好似同碗麵唔算太match .. XD
不過如果冇追加個年糕,香腸既話  成碗麵就好似冇乜好食咁


總結:
食完發覺原來兩個人咁食都幾飽 XDD
呢餐每人一百多少少 雖然係唔貴 不過下次如果想食有質素既韓國菜就一定唔會返黎食~~


餐廳資訊:
店家: Cafe首爾
地址: 大埔翠怡花園B座地下8號舖 Shop 8, G/F, Block B, Greenfield Garden, Tai Po
(港鐵太和站 A 出口, 步行約12分鐘)
電話: 3488 8414
營業時間: 星期一至日 11:30-22:30
Openrice主頁Here